Fréttir

11. mars var Holi haldinn hátíðlegur á Indlandi. Holi er vægast sagt áhugaverður dagur, þar sem allir henda lituðu dufti eða vökva hver á annan.

 

Við fórum í Holi-partí hjá konu sem framleiðir náttúrulega Holi liti sem var auðvelt að þvo af sér, þó að fötin séu ennþá skærgul. Sjálboðaliðarnir notuðu ódýrari liti, og þeir voru í öllum regnbogans litum það sem eftir var vikunnar. Myndir af stelpunum má sjá á Facebook, og af okkur á Picasa.

--

Um síðustu helgi fórum við svo í afslöppun til Goa, þar sem við gerðum nákvæmlega ekki neitt í 2 daga nema borða, drekka kaffi og slappa af. Mér tókst samt að sólbrenna vel á bakinu.

--

Vegabréfsáritunin er að gera okkur gráhærð. Ég fór í síðustu viku að tala við gaurana í útlendingaskráningunni, og þeir sögðu að pappírarnir væru í Mumbai, og við myndum fá símtal þegar þetta væri tilbúið. Ég fór svo aftur í þessari viku til að tékka á stöðunni, og þá var mappan okkar á borðinu hjá þeim.
Eftir smá grams í pappírunum og samráð við yfirmann var okkur sagt að mappan ætti að fara til Mumbai, og það yrði gert í næstu viku. Þegar ég spurði hvort þeir hefðu farið þangað áður eða ekki var svarið bara clerical mistake svo að annað hvort gleymdist að fylla eitthvað út meðan mappan var í Mumbai, eða það gleymdist að senda hana þangað. Seinni skýringin er trúlegri, miðað við fyrri reynslu.

Það er samt ótrúlega pirrandi að heyra það á mánudegi að mappan verði send af stað í næstu viku.

Athugasemdir

[fk (IP-tala skráð) 26.3.2009 kl. 17:33]

Þetta virðist vera óttalegt drullumall sem þið lentuð í, en örugglega mjög skemmtilegt.  
Vonandi fara Indverjarnir að drífa sig að stimpla pappírana ykkar. Þetta er orðið full langur tími og mörg dagsverk indverskra skrifstofumanna sem fara í þetta.
fk 

[Einar Jón, 29.3.2009 kl. 10:10]

Ég held að það taki núll dagsverk að gera ekki neitt.

Biðin á milli aðgerða tekur mun lengri tíma en aðgerðirnar sjálfar.